Rwanda: Uruganda rwa Volkswagen rugiye gutangira gukora no gucururiza imodoka mu Rwanda

23 Dec 2016
426 times

Guverinoma y’u Rwanda n’uruganda rwa Volkswagen bagiye gusinyana amasezerano y’ubufatanye arebana n’uko uru ruganda rwacururiza imodoka mu Rwanda, nyuma hakazanarebwa igice cyo kuziteranyirizamo mu Rwanda aho kugira ngo zikomeze kuva mu mahanga zihenze.

Aya masezerano byitezwe ko ashyirwaho umukono kuri uyu wa Gatatu tariki 21 Ukuboza 2016, azibanda ku modoka za Volkswagen zo mu bwoko bwa ThinkBlue, ni ukuvuga izitangiza ibidukikije zirimo izikoresha amashanyarazi n’ikoranabuhanga rituma zitanywa cyane kandi ntizohereze imyuka ihumanya ikirere yiganjemo CO2.

Imodoka zikoze muri gahunda ya Think Blue zirimo nka Polo BlueMotion, Golf BlueMotion, Passat BlueMotion, Touareg Hybrid.

Amakuru avuga ko aya masezerano arashyirwaho umukono n’Umuyobozi w’Ikigo cy’Igihugu cy’Iterambere, RDB, Francis Gatare n’Umuyobozi Mukuru wa Volkswagen muri Afurika y’Amajyepfo, Thomas Schaefer.

Igihugu cya Kenya cyabimburiye ibindi mu mikoranire na Volkswagen, aho kuwa 7 Nzeri byemejwe ko imodoka z’urwo ruganda rwatangiye gukora muri Mutarama 1937 zigiye kongera guteranyirizwa muri Kenya, nyuma y’uko icyo gikorwa cyari cyarahagaritswe ahagana mu 1970.

Kenya imaze kugira n’izindi nganda ziri muri iyo gahunda zirimo Isuzu, Toyota, Nissan na Mitsubishi, ariko inyinshi zikaba zari imodoka zigenewe imizigo n’inini zitwara abagenzi, hakiyongeraho na Uganda iri guteranya imodoka zikoresha imirasire y’izuba.

Mu gutangiza imikoranire na Kenya, Thomas Schaefer yagize ati "Twizera ko Kenya ifite amahirwe menshi yo gukora uruganda runini rw’imodoka, Afurika y’Iburasirazuba ifite ayo mahirwe, uyu munsi tukaba twishimiye iyi ntambwe ya mbere duteye kandi twifuza gukomeza mu bijyanye n’imodoka abantu bagendamo.”

Volkswagen nirwo ruganda rwa mbere rukora imodoka nyinshi muri Afurika y’Epfo, zikagurishwa muri icyo gihugu ndetse izindi zikoherezwa mu bindi bihugu by’uyu mugabane.

Ibihugu byo muri Afurika y’Iburasirazuba biheruka kwemeza kugabanya iyinjizwa ry’imodoka zishaje mu karere, ndetse imisoro y’imodoka zirengeje imyaka 10 ikaba yarahanitswe cyane, bimwe mu bihugu bikaba bitanazakira.

Izi mpinduka zishingiye ku gusoresha imodoka umusoro harebwa igihe imaze n’igiciro yasohokeyeho mu ruganda.

Imodoka imaze umwaka ikora ibarirwa ko yataye agaciro ka 20% isigaranye 80%, imaze myaka itanu igatakaza 55%, imaze imyaka itandatu ikaba yarataye 60%, imyaka irindwi ikaba yarataye 65%, imyaka umunani iba imaze guta agaciro ka 70%, imyaka icyenda iba imaze guta agaciro ka 75% naho izirengeje imyaka 10 zose ni iziba zarataye agaciro ku kigero cya 80%.

Imisoro ni ugufata igiciro imodoka yasohokeyeho ugakuba inshuro z’agaciro isigaranye ukagabanya ijana maze ukabona amafaranga uheraho usora. Habarwa 25% ya gasutamo, 18% ya TVA, ubundi umusoro ugaterwa n’imodoka, aho nk’ivatiri isora 5% naho nk’ama-Jeep agasora 15%.

Rate this item
(0 votes)

Ubuvugizi bwabaturage niyo ntego yacu!

Photo Gallery